Jeevan kee kala se mera yahee prayojan hai ki hamaaree sanvedansheelta, hamaaree paatrata, hamaaree graahakta, hamaaree respective itnee vikasit ho ki jeevan mein jo sundar hai, jeevan mein jo satya hai, jeevan mein jo shiv hai, vah sab-vah sab hamaare hriday tak pahunch sake. Us sabko ham anubhav kar sakein, lekin ham jeevan ke saath jo vyavahaar karte hain, usase hamaare hriday kaa darpan na to nikharta, na nirmal hota, na saaf hota; aur gandaa hota, aur dhool se bhar jaata hai. Usmein pratibimb padne aur bhee kathin ho jaate hain. Jis bhaanti jeevan ko ham banaaye hain-saaree shiksa, saaree sanskriti, saara samaaj manusya ke vyaktitv ko theek dishaa mein naheen le jaata hai. Bachpan se hee galat disha shuru ho jaatee hai aur vah galat disha jeevan bhar, jeevan se hee parichit hone mein baadha daaltee rahatee hai. Pahlee baat, jeevan ko anubhav karne ke liye ek praamaanik chitt, ek shuddh dimaag chaahiye. Hamaara saaraa chitt aupchaarik hai, faarmal hai, praamaanik naheen hai. Na to praamaanik roop se kabhee prem, na kabhee krodh, na praamaanik roop se kabhee hamne ghrina kee hai, na praamaanik roop se hamne kabhee kshama kee hai. Hamaare saare chitt ke aavartan, hamaare saare chitt ke roop aupchaarik hain, jhoothe hain, mithya hain. Ab mithya chitt ko lekar jeevan ke satya ko koi kaise jaan sakta hai? Satya chitt ko lekar hee jeevan ke satya se sambandhit hua jaa sakta hai. Hamaara poora dimaag, hamaara poora chitt, hamaara poora man mithya aur aupchaarik hai. Ise samajh lena upyogee hai. Subah hee aap apne ghar ke bahar aa gaye hain aur koi raah par dikhaayi pad gaya hai aur aap namaskaar kar chuke hain. Aur aap kahte hain ki usase milke badee khushee hui, aapke darshan ho gaye lekin man mein aap sochate hain ki is dost kaa subah hee subah chehra kahaan se dikhaayi pad gaya. Yah ashuddh dimaag hai, yah gair-praamaanik man kee shuruaat hui. Chaubees ghante ham aise dohre dhang se jeete hain, to jeevan se kaise sambandh hoga? Bandhan paida hota hai doharepan se. Jeevan mein koi bandhan naheen hai. (osho)